Tregtarët ambulantë të fruta perimeve në Korçë kanë protestuar pas vendimit të bashkisë për zhvendosjen e tyre nga tregu aktual drejt markatës së shijës.
Ata janë kundër çmimeve të vendosura për të shitur në këtë treg të ri, duke u shprehur se vlera prej 10 mijë lekësh është e papërballueshme për ta, ndërkohë që tek tregu aktual paguajnë vetëm 2 mijë lekë dhe sërisht xhiroja ditore është mjaft e ulët, aq sa nuk arrijnë të ushqejnë familjet e tyre.
Tregtarët kërkojnë që bashkia e Korçës të marrë parasysh kërkesat e tyre të shprehura edhe me një peticion disa ditë më parë dhe të ulë çmimet e tavolinave në markatën e re, pasi në të kundërt ata thonë se nuk do të pranojnë të shkojnë në këtë treg.
Markata e Shijes është një ndër projektet madhore në qytetin e Korçës me një fond investimi rreth 80 milionë lekë, të cilat janë investuar në tre faza nga Bashkia e Korçës, IADSA dhe TAP.
Aktualisht ky objekt është i përfunduar duke ofruar kushte bashkëkohore të tregtimit.
Në këtë treg janë të ndara hapësirat e tregtimit për fruta perimet, bulmetin, mishin e peshkun, ndërkohë që ofrohen edhe ambjente çlodhëse, si dhe zyra për administratën.
