shtë mbyllur pas 3 orësh protesta e thirrur nga Partia Demokratike mbrëmjen e sotme. Protesta nisi e qetë para Kryeministrisë, ku kryedemokrati Sali Berisha dhe mbështetësit e tij qëndruan për rreth 30 minuta, ndërsa nuk u shënua asnjë incident.
Më pas, protestuesit vijuan marshimin e tyre drejt Drejtorisë së Përgjithshme të Policisë së Tiranës, ku patën disa përplasje me efektivët, të cilët nuk lejuan qytetarët të vijonin më tej, ndërsa ishin vendosur disa metra para godinës.
Gjatë marshimit, protestuesit u vunë flakën kazanëve të mbeturinave, ndërsa vijuan rrugën e tyre drejt Drejtorisë së Policisë së Tiranës e më pas drejt zonës së ish-Bllokut.
Pasi u afruan te ish-vila e diktatorit Enver Hoxha, protestuesit hodhën një sasi të madhe molotovi dhe fishekzjarresh, duke i vënë flakën ndërtesës, e cila pësoi disa dëmtime të jashtme.
Ndërkohë pati përplasje edhe me policinë, ku nuk mungoi gazi lotsjellës dhe molotovët nga ana e të dy palëve.
Pas përplasjes në zonën e ish-Bllokut, Berisha u largua për në selinë e PD-së, ndërsa një grup i vogël protestuesish vijuan përplasjet me policinë edhe për disa minuta.
Në daljen e tij para mediave, Berisha e justifikoi dhunën para ish-vilës së diktatorit Hoxha, duke thënë se kishin marrë informacion të rremë nga policë të maskuar se aty jeton Edi Rama dhe qytetarët nuk u përmbajtën.
“Qytetarë dhe qytetare, në marshim e sipër, agjentë të infiltruar të policisë kriminale mashtruan kryengritësit se në shtëpinë e ish-diktatorit banon Edi Rama. Dhe kjo ngjalli një revoltë të pakufishme dhe bëri që ata t’i përvisheshin asaj banese. E gjithë beteja ishte shpërthim urrejtjeje ndaj Edi Ramës dhe jo ndaj ndërtesave. Por Edi Rama nuk banonte aty, miq. Edi Rama banonte te vila e Mehmet Shehut. Prandaj, Edi, tani fut jo një agjent, por edhe 120 agjentë po të fusësh, nuk do të mund të devijosh më. E dimë ku je, në Surrel ose te vila e Mehmet Shehut. Kjo është e vërteta. Për sqarim. Për të tjerat, ju e patë vetë madhështinë e revoltës sonë paqësore. Rrugaçërinë e Ilir Prodës dhe Sokol Bizhgës, dy vasalë, mercenarë të Edi Ramës, të cilët do të kenë fatin e tij”, tha Berisha.
Sa i përket protestës së radhës, Berisha paralajmëroi se do të jetë edhe më e fortë, por nuk përcaktoi ende një datë, ndërsa tha se do të zhvillohet së shpejti.
