Dy klubet e mëdha spanjolle Barcelona dhe Real Madrid, janë në qendër të vëmendjes së merkatos së verës. Katalanasit janë në ankth për te ardhmen e yllit të vet Neymar, i cili shkaktoi së fundmi edhe një tension brenda ekipit, duke u përplasur ne stërvitje me blerjen e fundit Semedo.
Në France e konsiderojnë tashmë çështje te mbyllur transferimin e tij tek PSG, klub që mesa duket do të paguaje klauzolën e largimit të brazilianit nga Barcelona, për 222 milionë euro. Dhe në këtë pikë, presidenti i katalanasve Bartomeu, që deri më tani kishte përgënjeshtruar çdo lajm për largimin e Neymar, duket se është dorëzuar dhe flet pa dorashka.
“Nuk kemi folur me PSG, por kur të mbarojmë turneun amerikan, do të ulemi në tavoline me Neymarin dhe do flasim. Në rast se transferimi do realizohet, paratë që do arkëtohen, do përdoren për të përforcuar ekipin. Megjithatë, ne duam që Neymar të qëndroje, por edhe klauzolat për këtë çështje vendosen. Parisienët duhet ta paguajnë klauzolën deri në qindarkën e fundit, nëse duan ta blejnë”.
Nga ana tjetër duket se kjo situatë po shqetëson edhe yjet e tjerë te Barcelonës. Në konferencën për shtyp para miqësore se luksit kundër Realit në SHBA, Iniesta dhe Suarez i kanë bërë thirrje shokut të skuadrës Neymar, që të mos heshte më dhe te sqaroje njëherë e mirë të ardhmen e tij, pasi kështu po i prish punë edhe ambientit në ekip. Mediat spanjolle sqarojnë se në rast largimi të Nejmar, katalanasit do të blejnë mes Kutinjos, Hazard, Dybales ose Dembele.
Në kampin rival, tek real Madrid, gjithashtu merkato po zien. Madrilenet duan të blejnë talentin e madh të Monaco, Kylian Mbape. Zërat e fundit te merkatos që shihnin edhe Mançester Cityn të interesuar për 18- vjeçarin francez, kanë bërë që Reali të nisë të lëvize konkretisht në lidhje me bisedimet me Monaco.
Bëhet fjalë për një oferte 160 milionë euro të madrileneve plus 20 milion euro bonuse, para të arkëtuara nga shitja e Hames Rodriges, Morates dhe Danilos. Por Monaco besohet se kërkon 200 milion euro, shifër vërtet e çmendur, por ndoshta jo për Realin, aq më tepër që nëse bëhet realitet edhe shitja e Garet Bale për 100 milion euro tek Mançester United.
