Tragjedia në Xhenova të Italisë mund të ishte parandaluar. E ndërsa vendi fqinj ka shpallur 2 ditë zie për shkak të shembjes së urës Morandi që shkaktoi vdekjen e të paktën 37 viktimave, inxhinierët italianë kishin paralajmëruar pasigurinë dhe kishin kërkuar rindërtimin e saj vetëm 2 vjet më parë.
Inxhinieri Antonio Brencich, kërkoi në 2016-n rindërtimin e urës së ndërtuar që në 1960-n, pasi struktura e saj ishte përkeqësuar shumë, pavarësisht rikonstruktimit në vitet 1980, 1990 dhe së fundmi dy vjet më parë. Ai tha për mediat pas fatkeqësisë se ura ishte një dështim i inxhinierisë.
Antonio Brencich: Shumë e konsiderojnë atë urë një kryevepër të vërtetë, por unë mendoj se është një dështim i inxhinierisë. Dhe ‘një nga tre urat e ngjashme të projektuar nga Riçardo Morandi, kanë pasur probleme. Ura u hap më 1967. Njëzet vjet pas hapjes së saj ata bënë një ndërhyrje në kullën lindore, gjë e cila është një operacion shumë i rëndë në një urë, e bërë pas njëzet viteve të jetës. Rënia urës në mënyrë të arsyeshme, ka një origjinë të ngjashme”.
Dy vjet më parë për revistën e inxhinierisë profesori në Universitetin e Xhenovës shkruante:
“Shpenzimet e vazhdueshme për mirëmbajtjen e urës sugjerojnë se në pak vite, këto kosto do të tejkalojnë kostot për rindërtimin e komplet urës.”
Mediat italiane bëjnë me dije se edhe pse herë pas here inxhinierët kishin paralajmëruar shembjen e saj, institucionet nuk e kishin marrë parasysh alarmin.
Ndërsa kompania që menaxhon autostradat në Itali ka deklaruar se do të angazhohet maksimalisht gjatë orëve në vijim për të rindërtuar urën e shembur në një kohë sa më të shkurtër.
