Brenda pak orësh, një familje nga Britania e Madhe pa të shkatërrohej ëndrra për të cilën kishte punuar për më shumë se një dekadë. Rory Clifford dhe Stephanie Harper kishin përgatitur gjithçka për t’u zhvendosur përgjithmonë në zonën malore të Peloponezit më 10 gusht, por zjarret shkatërruese në rajonin e Egjialeas dogjën plotësisht shtëpinë e tyre të re.
Çifti, përkatësisht 36 dhe 35 vjeç, kishte blerë pronën në vitin 2023 dhe kishte investuar mbi 300 mijë euro për ta kthyer atë në shtëpinë ideale për familjen e tyre. Ata kishin dërguar tashmë në Greqi sendet personale, kishin regjistruar vajzat e tyre binjake 8-vjeçare në një shkollë lokale dhe planifikonin të transferonin edhe tre qentë e tyre të shpëtuar.
Stephanie, e cila është shtatzënë me një tjetër çift binjakësh, tregoi dhimbjen e familjes pas lajmit për shkatërrimin e shtëpisë. “Nuk humbëm vetëm një shtëpi. Humbëm kujtimet dhe jetën që kishim krijuar aty”, u shpreh ajo, duke shtuar se ëndrra e ndërtuar me shumë sakrifica u zhduk brenda pak sekondash.
Familja kishte shitur pothuajse gjithçka në Britani për të nisur një jetë të re në Greqi. Ata kishin përdorur kursimet, kredi bankare dhe të ardhurat nga biznesi i tyre i mobilieve të dizajnit për blerjen dhe rinovimin e pronës, madje kishin shpenzuar mijëra paund për përmirësimin e sistemit të ujit.
Pas zjarrit, në vend të jetës së re në Peloponez, çifti dhe fëmijët e tyre janë detyruar të jetojnë në një apartament me një dhomë gjumi në Hastings të Anglisë. Motra e Stephanie ka hapur një fushatë ndihmash online për t’i mbështetur, pasi familja vlerëson se do t’u duhen rreth 100 mijë euro për të rindërtuar jetën e tyre.
Pavarësisht humbjes së madhe, çifti thotë se nuk do të heqë dorë nga ëndrra për t’u kthyer në Greqi. “Do ta rindërtojmë. Nuk mund të dorëzohemi”, tha Stephanie, ndërsa fëmijët, sipas saj, po e përballojnë situatën me një qetësi të admirueshme, edhe pse e kanë të vështirë të kuptojnë humbjen e papritur të jetës së re që mezi prisnin.
/vizionplus.tv
