Një zjarr i madh pyjor që shpërtheu pasditen e së enjtes pranë Almerías, në rajonin e Andaluzisë në jug të Spanjës, ka shkaktuar një tragjedi të rëndë, duke lënë të paktën 12 persona të vdekur. Sipas autoriteteve lokale, disa prej viktimave u gjetën të pajeta brenda automjeteve të tyre, ndërsa përpiqeshin t’i shpëtonin flakëve.
Kryeministri spanjoll, Pedro Sánchez, shprehu “trishtim të thellë” për pasojat tragjike të zjarrit dhe u shprehu ngushëllimet familjeve të viktimave. Ai u bëri gjithashtu thirrje ekipeve të emergjencës të tregojnë kujdes maksimal gjatë operacionit për vënien nën kontroll të flakëve.
Rreth 150 zjarrfikës, të mbështetur nga mjete tokësore, punuan gjatë gjithë natës për të frenuar përhapjen e zjarrit, ndërsa në zonë pritet të dislokohet edhe Njësia Ushtarake e Emergjencave (UME), e specializuar në përballimin e fatkeqësive natyrore.
Dozen people killed in southern Spain wildfire, officials said. pic.twitter.com/bzspEfINem
— Open Source Intel (@Osint613) July 10, 2026
Autoritetet urdhëruan evakuimin e banorëve nga disa zona të rrezikuara. Një grua me djegie dhe një tjetër person që kishte thithur tym u transportuan në spital, ndërsa disa banorë të tjerë morën ndihmë mjekësore në vendngjarje për probleme me frymëmarrjen dhe djegie të lehta. Dhjetëra persona kaluan natën në një qendër të përkohshme strehimi.
Sipas hetimeve paraprake, zjarri dyshohet se nisi pasi një kabllo elektrike ra pranë rrugës kombëtare N-340A, duke përhapur me shpejtësi flakët në zonën pyjore. Mbi 150 telefonata u regjistruan nga shërbimet e emergjencës menjëherë pas shpërthimit të zjarrit.
At least 12 people killed, 6 injured in Los Gallardos, Spain wildfire, officials say. pic.twitter.com/2jO5ve6o8C
— AZ Intel (@AZ_Intel_) July 10, 2026
Spanja po përballet prej ditësh me një valë të re të nxehti ekstrem, me temperatura shumë të larta që kanë rritur ndjeshëm rrezikun e zjarreve pyjore. Rajoni i Andaluzisë ishte vendosur tashmë në alarm portokalli, ndërsa autoritetet kanë paralajmëruar se kushtet atmosferike vazhdojnë të favorizojnë përhapjen e flakëve.
