Kreu i Partisë Republikane, Fatmir Mediu, thekson se e vetmja formë për ringritjen e opozitës është rikthimi i besimit dhe shpresës tek qytetarët.
Në emisionin Quo Vadis në Vizion Plus, Mediu deklaron se për të rikthyer shpresën duhet që opozita të mos frymëzohet nga banaliteti i retorikës së kryeministrit Rama, por duhet që të thotë të vërtetat pa gjuhë urrejtjeje.
“E gjithë historia e politikës shqiptare po degjeneron në një raport krejt personal dhe kjo nuk është politik, kjo është tragjedi, banalitet dhe këtu duhet opozita të gjejë frymëzimin. Opozita nuk mund ta gjejë frymëzimin tek banaliteti dhe t’i kthejë përgjigje banale Edi Ramës. Duhet t’i thotë të vërtetat dhe përveç se të thotë të vërtetat duhet të rikthejë raportin e shpresës dhe besimit. Urrejtja nuk del me urrejtje, urrejtja në një shoqëri del me dashuria, përbuzja del me respekt, vlerësimi i dinjitetit të njerëzve, këtë duhet të sjellë në plan të parë opozita”, shprehet Mediu.
Nga ana tjetër, Mediu e konsideron të papranueshme retorikën e përdorur gjatë fushatës elektorale nga kryesocialisti, Edi Rama, për të cilin shprehet se ka shkelur Kushtetutën duke thënë se do ndalojë investimet për zonat që do votojnë opozitën.
