Një operacion i koduar “Anchor” është finalizuar në Durrës, duke goditur një rast të dyshuar të trafikimit ndërkombëtar të lëndëve narkotike nga Kanadaja drejt Shqipërisë.
Në kuadër të operacionit, në Portin e Durrësit janë sekuestruar 127 pako me rreth 80 kilogramë kanabis të llojit “Gelato”, me përmbajtje të lartë THC. Sipas Policisë, vlera e lëndës narkotike në treg përllogaritet në rreth 1 milion euro.
Gjithashtu, gjatë operacionit janë sekuestruar 3 automjete, 5 aparate celularë dhe rreth 11 mijë euro cash.
Nga hetimet dyshohet se lënda narkotike sigurohej në Ontario të Kanadasë dhe transportohej drejt Shqipërisë, e fshehur në një hapësirë të modifikuar të një automjeti të porositur për blerje në Kanada. Pas mbërritjes në Shqipëri, dyshohet se droga shpërndahej në territorin shqiptar dhe në Kosovë.
Në vijim të operacionit janë arrestuar tre shtetas kosovarë: T.D., 32 vjeç, L.G., 26 vjeç dhe B.J., 40 vjeç. Ata dyshohen për veprën penale “Trafikimi i narkotikëve”.
Ndërkohë, janë shpallur në kërkim H.C., lindur dhe banues në Kukës, dhe G.O., lindur në Kosovë dhe banues në Ontario, Kanada, të dyshuar për të njëjtën vepër penale.
Sipas Policisë, nga hetimet e deritanishme dyshohet se personat e përfshirë kishin role të përcaktuara në sigurimin, fshehjen, transportimin dhe shpërndarjen e lëndës narkotike nga Kanadaja drejt Shqipërisë dhe më tej në Kosovë.
Operacioni u zhvillua nga strukturat e Policisë së Durrësit, në bashkëpunim me autoritetet kufitare, strukturat doganore dhe Prokurorinë.
Hetimet vijojnë për identifikimin dhe kapjen e personave të tjerë të dyshuar si të përfshirë në këtë aktivitet kriminal, si dhe për dokumentimin e plotë të rolit të secilit prej tyre.
/vizionplus.tv
