Tjetër takim Trump-Kim Jong Un
Shumë shpejte presidenti i Shteteve te Bashkuara Donald Trump dhe lideri i Koresë së Veriut mund te takohen serish.
Lajmin e bëri të ditur sekretari amerikan i shtetit Mike Pompeo pas vizitës në Phenian, ku bisedoi me udhëheqësin e vendit komunist. Pompeo e Kim Jong Un përcaktuan detajet për vendin dhe datën e takimit të ardhshëm, por ato nuk janë bërë ende publike.
Zëdhënësja e departamentit të shtetit tha të dielën se “sekretari Pompeo dhe kryetari Kim ranë gjithashtu dakord të udhëzojnë grupet respektive të punës për samitin e nivelit të lartë lidhur me çështjet e mbetura pa zgjidhje nga takimi i Singaporit në qershor.
Vizita e sekretarit amerikan Pompeo në vendin komunist kishte për qëllim arritjen e një marrëveshjeje për denuklearizimin e gadishullit, i cili do të pasohet me një takim mes Donald Trump dhe Kim Jong Un.
Pas Phenianit sekretari amerikan i shtetit ka vijuar turin e tij ne Korenë e Jugut dhe më pas në Kinë.
Marrëdhëniet mes Uashingtonit e Pekinit janë përkeqësuar për shkak të vendosjes së tarifave në miliona dollarë ndaj produkteve kineze.
