Tjetër çmim “Honoris Causa” për Agollin

Një tjetër Honoris Causa për Dritëro Agollin mbërrin në këtë përvjetor të 85-të të tij. Këtë herë e ka nderuar Universiteti i Tiranës. Në mungesë të shkrimtarit që për arsye shëndetësore nuk mundi të ishte i pranishëm në ceremoninë e këtij çmimi, në sallën e madhe të rektoratit kanë jehuar vargjet e tij, ato që nuk ishin botuar më parë. Të shkëputura nga vëllimi poetik “Prit edhe pak” që botohet nga Elona Agolli, si një dhuratë për ditëlindjen e babait të saj, këto vargje dhe një mirënjohje e thellë për këtë çmim e përcolli edhe vetë bija e shkrimtarit të madh. Kjo ngjarje që bëri bashkë pedagogë, studiues, njohës të letërsisë dhe ministren e kulturës lajmëroi edhe që poezitë e reja të Dritëro Agollit do të jenë në dorën e lexuesve në ditën e parë të panairit të librit, më 9 nëntor.