Tiranë, pezullohen 7 policë

7 efektivë të patrullës “Shqiponja” u pezulluan nga detyra për shkak të një ngjarje të ndodhur me kunatin e Ministrit të Brendshëm Saimir Tahiri. Mësohet se para 4 ditësh, një telefonatë e mbërritur në sallën operative të policisë, njoftonte se në një lokal pranë zonës së ish-Doganës, ishte një person i armatosur. Patrullat “Shqiponja” mbërrijnë në lokalin që është në pronësi të kunatit të Ministrit të Brendshëm, Alban Berisha. Ky i fundit, kërkoi arsyen e prezencës së patrullave dhe në debat e sipër kundërshtoi efektivët, të cilët e prangosin.
Një ngjarje e tillë është postuar në rrjetet sociale nga ish-kryeministri Berisha, i cili shton se pas kësaj, eskorta e ministrit me drejtorin e inspektimeve, bënë të mundur lirimin e kunatit të Ministrit të Brendshëm. Berisha shkruan në Facebook se pas pezullimit, efektivët kanë kërkuar ballafaqim me Drejtorin e Inspektimit të ministrit dhe drejtuesin e eskortës. Për ngjarjen ende nuk ka njoftim zyrtar të Ministrisë së Brendshme apo policisë së Tiranës, ndërkohë që 7 efektivët janë proceduar me masë disiplinore.