Ministrja e Infrastrukturës dhe Energjitikës, Belinda Balluku u thirr në interpelancë në seancën e kësaj të enjteje nga deputeti opozitar Artur Roshi, në lidhje me projektin e rrugës Tiranë-Durrës.
Nga foltorja e Kuvendit, Balluku deklaroi se në këtë aks nuk do të vendoset asnjë tra ndarës. Ministrja theksoi se projekti është në studim e sipër dhe ende nuk është marrë një vendim nëse ky aks do të bëhet me pagesë apo jo.
“Programi kombëtar për infrastrukturën është një program ambicioz, që synon për të përmirësuar standardet. Segmente e reja janë të kushtueshme. Koncesionet janë investime që paguhen nga privati dhe që shlyhen në kohë më të gjatë nga shteti. Si mund të filloj pagesa në shtator. Nuk bëhet fjalë për të vendosur as një tra as në shtator , as në tetor dhe as në dhjetor. Deri në shtator do ta vlerësojmë nëse ky ka vizibilitet. Ky projekt duhet vlerësuar në kuadër shumë më të gjerë. Ky projekt ndodhet në fazë studimi.”
Më tej ministrja tha se në të gjitha ato projekte që do të do të vendoset trau ndarës do të mundësohet si fillim rruga alternative për qytetarët.
“Të gjitha rrugët që në të ardhmen do të kenë atë që ju e quani tra, ka kuptim të aplikohet sepse ka të bëjë me mirëmbajtjen. Të gjitha ato projekte që do të kenë tra do të kenë edhe një rrugë alternative. Nëse do të bëhet ky projekt, duhet të këtë një rrugë alternative dhe kjo është rruga Tiranë-Plepa”
