Ndryshe nga zgjedhjet parlamentare të vitit 2013, për garën elektorale të 25 qershorit ka pasur zhvendosje të mandateve për deputet në disa qarqe të vendit. Lëvizjet demografike kanë qenë arsye që kanë detyruar kuvendin të marrë vendimin. Kështu, në Qarkun e Kukësit nga 4 mandate do të dalin 3 të tilla, Qarku i Beratit nga 8 mandate, do të prodhojë 7. E ndërkohë që një mandat i hiqet Korçës, e cila në 2013 nxirrte 12 deputetë. Këto mandate sipas ndarjes së re, kalojnë 2 në Qarkun Tiranë dhe një në Durrës.
Në zgjedhjet parlamentare të 23 Qershorit 2013, të 140 deputetët u zgjodhën nga 12 qarqet e vendit. Në Qarkun Berat, PS mori 4 mandate deputetësh, ndërkohë që PD dhe LSI nga 2 mandate secila. Qarku i Durrësit, mandatet i ndau mes PS-së 6 deputetë, PD-së 5 deputetë, LSI-së 1 deputet dhe PR-së 1 deputet. Nga votimet në Fier PS fitoi mandate për 9 deputetë dhe PD 4. Ndërkohë që LSI fitoi 2 dhe PDIU arriti të marrë 1 deputet.
Nga rezultatet e numërimit të votave në Korçë PS fitoi 6 deputetë, ndërkohë që PD 5 dhe LSI 1 mandat. Në Qarkun Lezhë, demokratët morën 4 deputetë,socialistët 2 dhe LSI fitoi një mandat. Qarku i Dibrës 6 mandatet i ndau mes PD-së 3, PS-së 3 dhe LSI-së 1. Në Qarkun Elbasan, votuesit vendosën që PS të marrë 6 deputetë, PD 4, LSI 2. E ndërsa dy mandatet e tjera u ndanë mes PR-së dhe PDIU-së. Në Gjirokastër, mandatet u ndanë 3 për PS-në, 1 për PD-në dhe 1 për LSI-në. Në Qarkun e Kukësit, mandatet shkuan vetëm për dy partitë kryesore, 3 për demokratët dhe 1 për socialistët.
Zgjedhësit në Qarkun e Shkodrës vendosën që PD të marrë 5 mandate, PS 4, LSI 1 dhe PKD 1 mandat për deputet. Në Qarkun e Vlorës, socialistët fituan 6 deputetë, demokratët 3, ndërkohë që nga një deputet fitoi LSI, PBDNJ dhe PDIU. Në Tiranë, i cili është edhe qarku që prodhon numrin më të madh të deputetëve, PS fitoi 16 mandate deputetësh, PD 11, LSI 3, PR 1 dhe PDIU 1 mandat.
