Një park lojërash prej 520 metra katrorë është destinacioni i ri i fëmijëve të kryeqytetit. Tirana Bank i ka dhuruar vogëlushëve një tjetër hapësirë argëtimi në një prej zonave periferike të Tiranës.
Parku i lojërave është ndërtuar në zonën e Saukut sipas një projekti me Bashkinë e Tiranës.
Në ceremoninë e hapjes ishte drejtori i përgjithshëm ekzekutiv i Tirana Banka, Dritan Mustafa si dhe përfaqësues të pushtetit vendor.
Mustafa në fjalën e tij tha se në të ardhmen Tirana Bank do të jetë pjesëmarrëse në shumë projekte social-kulturor për të ofruar ambiente komode dhe qendra argëtimi në mënyrë që të përmirësohet jeta e banorëve të kryeqytetit.
“Çdo bashkëpunim me Bashkinë e Tiranës është kënaqësi e madhe, sidomos kur kontributet tona të përbashkëta shkojnë në ndihmë të komuniteteve dhe në mënyrë të veçantë ndaj fëmijëve. Në fakt, ky është një detyrim për të gjitha bizneset, për të mbështetur me të gjitha format këto projekte të rëndësishme që përmirësojnë cilësinë e jetës së banorëve. Tirana Bank mbetet e përkushtuar të ofrojë mbështetje për komunitetet nëpërmjet projekteve të ndryshme të përgjegjshmërisë sociale.”
Investimi i Tirana Bank në këtë park është bërë me qëllim që të gjithë fëmijët të ndjehen të barabartë dhe të kenë të njëjta kushte e mundësi argëtimi ashtu si ne zonat e tjera. Parku i lojërave në Sauk është një ndër projektet e shumta sociale që janë mbështetur nga Tirana Bank.
