Sekretari amerikan i Shtetit, Rex Tillerson akuzoi Iranin për provokime të vazhdueshme që synojnë destabilizimin e Lindjes së Mesme dhe cenimin e interesave amerikane në rajon. Duke folur një ditë pasi njoftoi se do të kishte rishikim të politikave kundrejt Iranit, përfshirë edhe sanksionet, Tillerson tha se ky shtet kishte potencialin për tu shndërruar në një rrezik të ngjashëm me Korenë e Veriut.
“Dua te ndalem tek provokimet e vazhdueshme alarmuese të Iranit, që eksportojnë terror dhe dhunë, duke destabilizuar më shumë se një shtet. Irani është sponsori kryesor i terrorizmit dhe është përgjegjës për intensifikimin e konflikteve të shumëfishta dhe minimin e interesave amerikane në vende si Siria, Jemeni, Iraku e Libani. Nëse nuk mbahen nën kontroll, ka potencialin të ndjekë të njëjtën rrugë si Koreja e Veriut.”
Sipas Sekretarit amerikan të Shtetit, Irani ka ndërmarrë sulme kibernetike kundër SHBA-së dhe partnerëve të gjirit, qëndron pas sulmeve terroriste në vende të ndryshme të botës e mbështet armët e shkatërrimit në masë. Presidenti amerikan Donald Trump urdhëroi më herët një rishikim të marrëveshjes bërthamore me Iranin, edhe pse Uashingtoni e pranon se Teherani po i përmbahet kushteve të marrëveshjes së nënshkruar në vitin 2015.
