Sekretari amerikan i Shtetit, Rex Tillerson, ndodhej në kryeqytetin turk Ankara, ku është takuar me presidentin Erdoan, kryeministrin Jildirim dhe ministrin e Jashtëm Caushoglu. Në fokus të takimeve ishin hapat që do të ndërmerren në luftën kundër Shtetit Islamik dhe Tillerson u përpoq që dy aleatët e NATO-s të linin pas dallimet për mbështetjen ndaj luftëtarëve kurdë. Në një konferencë të përbashkët me homologun turk, ai theksoi se nuk ka boshllëk mes SHBA dhe Turqisë në vendosmërinë për të mposhtur ISIS.
“Tek SHBA turqit gjejnë një aleat besnik dhe partner që është i angazhuar për sigurinë e tyre dhe për bashkëpunimin ekonomik. Presim me padurim të përballojmë sfidat dhe adminsitrata Trump do të ndërtojë marrdhënie me aleatin dhe mikun tonë”.
Vizita e Tillerson erdhi në një moment të vështirë në raportet mes dy vendeve kur Turqia shpreson që të ketë përmirësim të tyre nga administrata Trump, ndonëse deri tani nuk ka patur ndonjë zhvillim pozitiv.
Përveç dallimeve për Sirinë, tension ka pasur edhe për fatin e klerikut turk në SHBA, Fetullah Gylen, pasi Ankaraja kërkon ekstradimin e tij. Caushoglu tha se Turqia shpreson që Uashingtoni të marrë hapa konkrete për këtë, përfshirë edhe një ndalim të përkohshëm të tij, por Tillerson nuk bëri ndonjë koment.
Në takim u bisedua për ofensivën e udhëhequr nga Shtetet e Bashkuara për të rimarrë qytetin e Rakës nga Shteti Islamik dhe stabilizimin e zonave që më parë mbaheshin nga ISIS, për të siguruar kthimin në shtëpi të refugjatëve.
