Thomas Tuchel, shumë pranë stolit të kombëtares së mirënjohur

Reklamë

Pas Sven-Göran Eriksson dhe Fabio Capello, gjermani Thomas Tuchel, 51 vjeç, mund të bëhet trajneri i tretë i huaj që drejton “Tre Luanët”. Sipas “Welt TV”, marrëveshja mes Tuchel dhe FA është shumë afër. Pas largimit të Gareth Southgate, stoli i kombëtares së “Tre Luanëve” iu besua në mënyrë të përkohshme Lee Carsley.

Pas humbjes së Anglisë në “Wembley”, në Ligën e Kombeve, kundër Greqisë, të enjten e kaluar, Carsley tha: “Kanë mbetur ende tri ndeshje, pastaj shpresoj të kthehem për të drejtuar U-21”.

Federata Angleze e Futbollit ia dha Carsley përgjegjësinë për drejtimin e kombëtares së madhe në sfidat e shtatorit, tetorit dhe nëntorit, pra të Ligës së Kombeve. E filloi shumë mirë, me fitore ndaj Irlandës në transfertë (0-2) dhe Finlandës në shtëpi (2-0), por më pas humbi ndaj Greqisë.