Mijëra njerëz pritet të mbajnë një marshim në rrugët e Madridit dhe qytete të tjera spanjolle kundër pavarësisë së Katalonjës.
Si kundërpërgjigje, edhe mbështetës të referendumit kanë bërë thirrje për nje demonstrate të ngjashme në Barcelonë.
Presidenti Katalanas Karles Puixhmont, është takuar me një grup ndërmjetësish të përbërë nga anëtarë të shoqatës Barcelona Bar Association, liderë të biznesit e përfaqësues sindikatash dhe universitetesh, për të nxitur dialogun mes qeverisë qendrore e asaj rajonale me qëllim gjetjen e një zgjidhjeje për krizën e referendumit të pavarësisë.
Mediat shkruajnë se ai ka vendosur ta shpallë pavarësinë të martën, një ditë më vonë nga ç’pritej. Në këtë ditë ai pritet të mbajë një fjalim në parlamentin rajonal, ku do të shpallë shkëputjen nga Spanja.
Një ditë më parë përfaqësues të qeverisë spanjolle në Katalonje kane kërkuar falje në emër të oficerëve për të lënduarit nga policia ditën e referendumit, kur policia ishte e udhëzuar të ndalonte votimin me çdo kusht dhe të sekuestronte fletët e kutitë e votimit nëpër shkolla dhe qendra të tjera votimi.
Të paktën 900 persona mbetën të plagosur atë ditë, mes të cilëve dhe 33 policë.
