Kryeministrja britanike Theresa May bëri të ditur se do të ndjejë krenari njëkohësisht edhe zhgënjim kur të lërë postin pas 12 ditëve.
Në një intervistë për BBC, May nuk e fshehu zhgënjimin që çështja e Brexit për të cilën ajo luftoi aq shumë, nuk u vlerësua.
Theresa May: Unë mendoj se ka një ndryshim të madh mes Parlamentit dhe publikut. Publiku ka një pikëpamje shumë të thjeshtë për Brexit. Ata e dhanë verdiktin e tyre dhe ne duhet të vazhdonim punën për të respektuar vendimin e qytetarëve. Ata e dinë që deputetët në parlament nuk ishin të gatshëm të bënin një kompromis për të arritur shumicën në parlament”.
Por May nënvizoi se për 3 vjet me radhë ajo ka arritur shumë dhe gjithçka është bërë në emër të interesit kombëtar. Megjithatë, I vjen keq që I duhet të largohet kur dëshironte të bënte akoma më shumë për vendin.
Kryeministrja në Largim do të lërë detyrën më 24 korrik, e në karrigen e saj do të ulet Boris Johnson ose Jeremy Hunt.
Duke i uruar fitoren e më të mirit, May tha se puna që ata do të marrin përsipër, kërkon shumë përgjegjësi.