Presidenti i Kosovës, Hashim Thaçi, gjatë qëndrimit të tij në SHBA është takuar në Uashington me këshilltarin e Shtëpisë së Bardhë për siguri kombëtare, John Bolton.

 

Thaçi është shprehur se në këtë takim është folur në lidhje me shanset e dialogut mes dy vendeve Kosovës dhe Serbisë.

 

“U pajtuam se ekziston një shans historik në dialog (v.j. midis Kosovës dhe Serbisë) i cili nuk duhet të humbet nga dy shtetet. Kjo i mundëson Kosovës anëtarësimin në NATO, Kombet e Bashkuara dhe Bashkimin Evropian”.

 

Gjithashtu presidenti i Kosovës ka falënderuar Boltonin për “mbështetjen e plotë që Kosova ka hasur në këtë administratë”.

 

Ndërkohë në një njoftim të shpërndarë nga Presidenca e Kosovës thuhet se në këtë takim “është biseduar për marrëdhëniet ndërmjet dy shteteve, për perspektivën euroatlantike dhe për domosdoshmërinë e arritjes së një marrëveshjeje ndërmjet Kosovës dhe Serbisë, si parakusht për paqe dhe stabilitet afatgjatë në rajon”.

 

Nga ana tjetër bëhet me dije se Bolton, e ka siguruar presidentin e Kosovës se Shtëpia e Bardhë dhe administrata e presidentit Donald Trump e mbështesin fuqishëm arritjen e një marrëveshjeje gjithëpërfshirëse ndërmjet Kosovës dhe Serbisë.

 

Ndërsa më herët Bolton ka deklaruar se SHBA nuk e përjashton idenë e korrigjimeve territoriale, nëse Kosova dhe Serbia arrijnë marrëveshje për një gjë të tillë.

 

Ideja për ndryshim kufijsh midis Kosovës dhe Serbisë është shpalosur nga vetë presidentët e dy vendeve, Hashim Thaçi dhe Aleksandar Vuçiç, si mundësi për zgjidhjen e problemeve midis tyre.

Leave a Reply

Your email address will not be published.