Thaçi përfundon dëshminë në Hagë: Lufta e UÇK ishte e drejtë, s’kam bërë krime

Presidenti Hashim Thaçi përfundoi mbrëmjen e së enjtes intervistimin në Prokurorinë e Posaçme në Hagë, pas akuzave ende të pakonfirmuara për krime lufte në Kosovë.

Intervista e tij zgjati 4 ditë, ku për gati 28 ore, Thaçi është detyruar t’i përgjigjet pyetjeve të prokurorisë.

Pas përfundimit të dëshmisë maratonë, presidenti i Kosovës tha se për 4 ditë me radhë, pati mundësinë të japë sqarimet e tij lidhur me aktivitetin gjatë dhe pas luftës.

“HASHIM THAÇI
PRESIDENT I KOSOVES

Më vjen shumë mirë që për 4 ditë me radhë kisha mundësinë të jap sqarimet e mija për të gjitha çështjet, që ndërlidhen me aktivitetin tim gjatë periudhës së luftës dhe përpjekjet e mija për paqe, stabilitet, zhvillim dhe progres. Gjatë këtyre katër ditëve jam munduar të jap dhe sqaroj informacione për rolin tim, përgjegjësitë e mija gjatë luftës, gjatë periudhës që mbulon pra mandati i Gjykatës Speciale.”

Duke i cilësuar seancat si produktive, presidenti Thaçi nënvizoi se prokuroria dhe gjykata duhet të vendosin me drejtësi.

“HASHIM THAÇI
PRESIDENT I KOSOVES

Tani i mbetet prokurorit dhe gjykatës që të vlerësojnë me paanshmëri dhe me mendje të hapur dëshminë. Në rast se ata bëjnë një gjë të tillë në mënyrë profesionale të paanshme dhe të ndershme, ata lehtë mund të vijnë në përfundimin se unë kam bërë asnjë lloj krimi apo shkelje të pretenduara. Në çdo rast, më lejoni të theksoj se lufta jonë ka qenë e drejtë sepse ka qenë luftë për liri, pikërisht që ka qenë luftë e drejtë ne kemi pasur mbështetjen e botës demokratike SHBA-së, BE-së dhe të NATO-s, rrugëtim ky që ka zgjatur i suksesshëm, i përbashkët tash e dy dekada dhe do të jetë i përjetshëm.”

Presidenti i Kosovës theksoi se “përpjekjet për të rishkruar historinë, dhe përpjekjet për të njollosur luftën e drejtë janë gjithashtu përpjekje për të njollosur ndërhyrjen humanitare të NATO-s në Kosovë.

“Por e vërteta e jonë e dhimbshme dhe krenare është e pastër si loti ndërsa historinë tonë nuk do të mund ta ndryshoj askush, ajo është e drejtë e pastër dhe jemi krenarë”, tha presidenti. Tashmë akuzat e Prokurorisë së Posaçme i janë dorëzuar një gjykatësi të procedurës paraprake, i cili duhet të vendosë për konfirmimin apo hedhjen poshtë të tyre.