Ka nisur rreth orës 13 marrja në pyetje e presidentit të Kosovës Hashim Thaçi në Hagë pas ftesës së Prokurorisë së Specializuar.
Pak para se të hynte në ndërtesën e Prokurorisë së Specializuar Thaçi tha para mediave se beson që nga kjo sfidë do të dalë i suksesshëm.
HASHIM THAÇI
PRESIDENT I KOSOVES“Sot ndodhem këtu në respekt të asaj që kam ëndërruar dhe për të cilën kam luftuar: Një Kosovë të lirë dhe të pavarur e bazuar në të drejta të barabarta, shoqëri multietnike dhe sundimin e ligjit. Unë jam gati të përballem me këtë sfidë të re dhe t’ia dal për djalin tim, familjen time, qytetarët e mi dhe vendin tim”
Thaçi tha prerë se askush nuk mund të rishkruajë historinë e Kosovës së lirë dhe se ky është “çmimi për lirinë”. Presidenti Thaçi theksoi se vendi i Kosovës është në Bashkimin Europian, e NATO dhe duke vazhduar miqësinë e përjetshme me SHBA-në.
HASHIM THAÇI
PRESIDENT I KOSOVES“Askush nuk mund të rishkruajë historinë e Kosovës dhe ky është çmimi i lirisë. Unë besoj në paqen përmes pajtimit, të vërtetës dhe drejtësisë. Unë besoj në dialogun dhe marrëdhëniet e mira me fqinjët. Kosova është një histori suksesi për të cilin unë ndihem shumë krenar. Destinacioni i Kosovës është të bëhet anëtare e Bashkimit Europian, NATOn dhe miqësia e përjetshme me SHBA-të.”.
Thaçi mbrohet nga avokati amerikan Pierre-Richard Prosper, ish prokuror në Tribunalin Ndërkombëtar të OKB-së për krime në Ruandë dhe me një karrierë të gjatë në drejtësi.
Dhjetëra shqiptarë të Kosovës ishin të pranishëm para Gjykatës së Hagës. Me pankarta në duar në mbështetje të Thaçit e UÇK-së, ata kërkuan drejtësi për mijëra shqiptarët e vrarë nga serbët gjatë dhe pas luftës në Kosovë.
Në aktakuzën e publikuar më 24 qershor, Thaçi dhe kreu i PDK-së Kadri Veseli akuzohen për krime lufte dhe krime kundër njerëzimit. Me anë të një postimi në facebook ish-kryeparlamentari tha se beteja e Presidentit në Hagë, do të jetë betejë triumfuese e Kosovës, pasi lufta e UÇK-së ishte e drejtë dhe e pastër.
Edhe ish kryeministri Ramush Haradinaj, tha se “ Shqiptarët kanë bërë luftë të drejtë, në mbrojtje të pragut të shtëpisë, dinjitetit dhe Atdheut”.
Aktakuza ndaj Thaçit erdhi në një kohë kur kreu i shtetit po udhëtonte drejt Uashingtonit, në një takim të organizuar nga Shtëpia e Bardhë për rifillimin e dialogut Kosovë-Serbi. Ky zhvillim solli anulimin e takimit.
Emrat e Thaçit e Veselit janë në mesin e mbi 200 ish –pjesëtarëve të Ushtrisë Çlirimtare të Kosovës të cilët janë marrë në pyetje nga dhomat e specializuara që nga fillimi i vitit 2019.
Një vit më parë në prokurorinë e posaçme u thirr edhe ish kryeministri i Kosovës, Ramush Haradinaj, i cili dha dorëheqje duke e çuar vendin në zgjedhje të parakohshme.
