Partia Demokratike ka ndryshuar qëndrim dhe ka vendosur të shkojë në Komisionin e Reformës Territoriale. Vendimi për të marrë pjesë në këtë Komision është marrë pas mbledhjes së grupit parlamentar demokrat ku të gjithë deputetët që morën fjalën kërkuan që opozita të jetë pjesë e Reformës Territoriale.
Në fillim të mbledhjes së grupit, në pjesën e hapur për mediat, kryetari I PD Sali Berisha as nuk e përmendi Komisionin e Reformës Territoriale, por u fokusua tek organizimi i protestave kundër Kryeministrit Edi Rama.
“Janë me qindra qytetarë që më shkruajnë dhe më thonë se nuk duhet të largohemi nga bulevardi pa larguar Edi Ramën. Ne drejt asaj do të shkojmë. Të themi të vërtetën. Ne drejt asaj do të shkojmë në mënyrë të pashmangshme, në mënyrë të sigurt”, tha Berisha.
Por pasi mediat u larguan nga mbledhja e grupit, deputetët demokratë ngritën shqetësimin për kostot me të cilat mund të perballet PD nëse bojkoton Reformën Territoriale.
Nënkryetari i PD Oerd Bylykbashi, I cili është Bashkëkryetar i Komisionit të Reformës Zgjedhore mbrojti idenë se Partia Demokratike duhet të bëhet pjesë e Reformës Territoriale.
Anëtarët e Komisionit të Reformës Territoriale Eno Bozdo, Bledion Nallbati e Xhelal Mziu gjithashtu ishin që PD të shkojë në komision. Edhe pse demokratët nuk kanë iluzione për qasjen politike të liderit të mazhorancës Rama ndaj opozitës aq më tepër që ai i ka votat për ta miratuar i vetëm Reformën Territoriale, deputetët besojnë se duhet të jenë në komision për të zhbërë reformën e vitit 2014 e cila sipas tyre ka dështuar. Ata gjykojnë që opozita duhet të jetë në komision për të shpjeguar se si duhet të ishte një Reformë Territoriale që u shërben qytetarëve.
Kundër bojkotit sot në mbledhjen e grupit ishin edhe Kryetarja e Komisionit për Kulturën Ina Zhupa, e Kryetari i Forumit Rinor Besart Xhaferri.
Në fund të mbledhjes së grupit parlamentar, Kryetari i PD Sali Berisha e bëri të qartë se për opozitën komisioni më i rëndësishëm është Këshilli i Mandateve dhe Imunitetit ku ndodhet kërkesa e SPAK-ut për arrestimin e Belinda Ballukut.
Pas mbledhjes së grupit parlamentar Berisha zhvilloi edhe një mbledhje tjetër me figurat kryesore të partisë dhe u vendos që PD të shkojë në Komisionin e Reformës Territoriale.
“PD do vijojë të jetë pjesë e Komisionit të Reformës Territoriale”, u shpreh Bocci.
Boçi konfirmoi se do të flasë me homologun socialist Mazniku për të caktuar një mbledhjë të Komisionit, duke vënë në dukje se nuk ka arsye që nesër parlamenti të ndryshojë përbërjen e tij.
Krahas Reformës Territoriale, PD do të marrë pjesë edhe në Komisionin e Reformës Zgjedhore.
