Tensionohet situata në kufirin greko-maqedonas, ndërsa qindra refugjate kanë rrëzuar gardhin me tela me gjemba duke përdorur një shtyllë çeliku. Rebelimi ka ndodhur në qytetin kufitar Idomeni, në të cilin janë vendosur përkohësisht 6 mijë e 500 emigrantë, kryesisht nga Siria. I menjëhershëm ka qenë reagimi i policisë kufitare në Maqedoni, që kanë hedhur gaz lotsjellës për të larguar tubuesit. Tensionet në kufi kanë shpërthyer, pasi prej disa ditësh Maqedonia, Serbia, Bullgaria, Hungaria, Kroacia e Austria kanë mbyllur kufijtë. Kjo ka sjellë mbipopullim në Greqi, pasi mijëra emigrantë të tjerë kanë pushtuar portin e Pireut. Më herët kancelaria gjermane Angela Merkel, duke folur pas vendimit për mbylljen e kufijve, ka thënë se nuk duhet lejuar që Athina zyrtare të përballojë e vetme krizën e refugjatëve. Sipas saj, nevojitet një zgjidhje e përbashkët. Bllokimi i kufijve nga pala maqedonase dhe vendet e tjera të Ballkanit, ka bërë që një rrugë kalim i mundshëm për refugjatët të jetë edhe Shqipëria. I pyetur më herët në zërin e Amerikës, se cili do të ishte qëndrimi i Tiranës zyrtare për këtë çështje, ministri i jashtëm Ditmir Bushati tha se politika e kufijve të mbyllura është e gabuar dhe se  Shqipëria është për një zgjidhje të përbashkët të kësaj krize, duke nënkuptuar se do të lejonte kalimin e tyre.

 

 

 

Leave a Reply

Your email address will not be published.