Dita e martë pritet të karakterizohet nga temperatura shumë të larta në të gjithë vendin, si pasojë e ndikimit të masave ajrore të qëndrueshme dhe të nxehta.
Sipas parashikimit të motit, pjesa më e madhe e territorit do të përfshihet nga një mot i kthjellët, ndërsa vranësira të pakta deri mesatare do të shfaqen gjatë orëve të mesditës dhe pasdites, kryesisht përgjatë relieveve malore.
Temperaturat maksimale do të arrijnë deri në 41°C në Gjirokastër, ndërsa në Berat dhe Shkodër pritet të shënohen deri në 40°C. Termometri do të ngjitet në 39°C në Lezhë, Tiranë, Elbasan dhe Fier.
Era do të fryjë nga drejtimi veriperëndim-veri me shpejtësi mesatare rreth 7 m/s. Herë pas here, veçanërisht përgjatë vijës bregdetare dhe në zonat luginore, era pritet të fitojë shpejtësi deri në 14 m/s.
Edhe në det do të ketë një valëzim të moderuar, me forcë 1–3 ballë.
