Superliga shqiptare luan javën e tretë të saj këtë të shtunë me të tjera ndeshje të forta. Vëmendje merr Teuta-Dinamo , të dyja skuadra që në dy takimet e para kanë grumbulluar 4 pikë me një fitore dhe një barazim . ”Djemtë e Detit” vijnë si kampion në fuqi ndërsa nëndetësja blu vjen me motivimin e rikthimit në superiore pas 9 vitesh. Në prag të sfidës, trajneri Edi Martini u shpreh se djemtë e tij nuk e shohin veten favoritë kur e gjithë skuadra kryeqytetase është e përbërë nga futbollistë, që e njohin mirë kampionatin shqiptar.
Nga ana tjetër Tirana ka një ndeshje të lehtë në letër përballë Kastriotit në stadiumin e Kamzës .Trajneri Orges Shehi tha se bardheblutë e kanë studiuar mirë kundërshtarin ndonëse e cilësoi si një provim të radhës.
ORGES SHEHI- TRAJNER I TIRANËS
”Futbolli është provim, javë pas jave vihesh përballë skuadrave kushdo qofshin ato duhen tre pikët. Mendoj që ndeshjet që janë në letër duken më të lehta bëhen më të vështira. Kështu është shorti këtë javë përballesh me Kastriotin dhe javës tjetër me Laçin, janë kundërshtar që duhet vlerësim dhe nuk duhet të nisemi se kush është përpara janë tre pikë që duhen.”
Perpara gazetareve ishte dhe futbollisti Vesel Limaj i cili theksoi se asnjë ndeshje nuk është e thjeshte.
VESEL LIMAJ- FUTBOLLIST I TIRANËS
Çdo ndeshje ndaj Kastriotit në transfertë është e vështirë. Është një ekip që luan fort dhe e dimë se çfarë na pret nesër. Shpresoj që të jetë një fushë e mirë sepse jemi një ekip që luajmë topin dhe nuk shoh problem për ne
Të dyja takimet e të shtunës do të luhen në orën 13:45 . Ndërkaq duelet e tjera janë rezervuar të dielën ku spikat sfida Partizani-Vllaznia, ndërsa Laçi pret Kukësin dhe Egnatia- Skënderbeu.
