Të shtëna me armë në Parlamentin e Iranit

Terrorizmi godet edhe Iranin. Dy sulme ku janë përfshirë edhe kamikazë kanë ndodhur në kryeqytetin Teheran, në parlament dhe mauzoleumin e liderit suprem imamit Khomeini, themeluesi i Republikës Islamike.

Mediat raportojnë për të paktën 12 të vdekur dhe 30 të plagosur, civilë dhe roja sigurie. Sulmet janë marrë përsipër nga Shteti Islamik përmes agjencisë së lajmeve Amaq.

4 terroristë të armatosur me kallashnikovë e pistoleta mëngjesin e kësaj të mërkure kanë hyrë në ndërtesën e parlamentit, ku kanë hapur zjarr dhe kanë marrë peng disa persona. Një prej tyre me eksploziv në trup ka hedhur veten në erë.

Edhe në mauzoleumin e Khomeinit raportohet se kanë vepruar 4 persona, njëri prej të cilëve ka shpërthyer veten. Një tjetër ka mbetur i vrarë gjatë shkëmbimit të zjarrit me forcat e sigurisë, një tjetër është vetëhelmuar me cianur dhe një grua është arrestuar. Ministria e Inteligjencës raportoi se është shmangur edhe një sulm i tretë nga një grup terrorist.

Pas disa orësh tension policia ka marrë në kontroll ndërtesën e parlamentit. Kryeparlamentari Ali Larijani deklaroi se sulmet treguan se terroristët kanë objektiv Iranin, si pikë efikase në luftën kundër terrorizmit.