Të paktën tre persona humbën jetën dhe 14 të tjerë mbetën të plagosur pas një sulmi me armë zjarri në një bar në Austin, në shtetin e Texas.
Ngjarja ndodhi në ambientet e barit Buford’s Backyard Beer Garden, një lokal i njohur në zonën e argëtimit të qytetit. Sipas shefes së Policisë së Austin, Lisa Davis, autoritetet morën njoftim për një person të armatosur që po qëllonte brenda lokalit.
Kur forcat e rendit mbërritën në vendngjarje, u përballën me të dyshuarin e armatosur dhe hapën zjarr ndaj tij, duke e lënë të vdekur. Motivi i sulmit mbetet ende i paqartë.
Shefi i Shërbimeve të Urgjencës në Austin (EMS), Robert Luckritz, bëri të ditur se tre persona u konstatuan të pajetë në vendin e ngjarjes, ndërsa 14 të plagosur u transportuan në spitalet lokale. Tre prej tyre ndodhen në gjendje kritike.
Sipas autoriteteve, telefonata e parë për ndihmë u regjistrua në orën 01:39 të mëngjesit, ndërsa brenda më pak se një minute ekipet e emergjencës dhe oficerët e policisë mbërritën në vend për të ofruar ndihmë.
Kryebashkiaku i Austin, Kirk Watson, vlerësoi reagimin e shpejtë të forcave të sigurisë, duke theksuar se ndërhyrja e menjëhershme ka kontribuar në shpëtimin e jetëve.
/vizionplus.tv
