Suksesi ndaj Gjeorgjisë në transfertë ishte jetik për kombëtaren kuqezi.
Tre pikët kanë ndryshuar tërësisht atmosferën rreth skuadrës, e cila ishte goditur fort në aspektin psikologjik pas dy humbjeve radhazi kundër Gjeorgjisë në Tiranë dhe Çekisë në Pragë. Mirëpo veç moralit të rritur tashmë, me shumë rëndësi suksesi ishte edhe për të na kthyer në lojë për vendin e parë.
Tani e kemi vetë në dorë fatin tonë, pasi mund ta arrijmë këtë sukses duke marrë pikët e plota në nëntor kundër Çekisë kryesuese dhe Ukrainës së vendit të fundit. Silvinjo i kritikuar jo pak pas dy humbjeve radhazi me lojë të dobët, e ka një mesazh paraprak për lojtarët.
“Jam krenar që jam trajner i kësaj skuadre. Pas festës së merituar për këtë sukses do të nisin menjëherë punën për sfidat e nëntorit, shpresojmë ti bashkohemi festës shqiptare në muajin nëntor. Një mesazh për të gjithë, të qëndrojmë me këmbë në tokë. Këtu mund të ndodhë gjithçka, çdokush mund të mposhtë këdo në shtëpi apo jashtë”, tha Silvinjo.
Megjithëse ishte një ndeshje ku dukshëm spikatën disa lojtarë mbi të tjerët, sikurse dyshja qendrore e mbrojtjes Ismajli apo Ajeti si dhe anësori i djathtë Balliu që më në fund u preferua titullar, vetë trajneri i kuqezinjve preferoi të lartësojë grupin më shumë sesa individët.
“Ishte një ndeshje shumë e mirë. Nuk dua të merrem me individë të veçantë, i gjithë grupi ka bërë shumë mirë, ishte i motivuar. Kemi bërë shumë mirë dhe kjo ka rëndësi”, shtoi ai.
Në Tblisi kuqezinjtë fituan 1 me 0 falë një goli të Asllanit në pjesën e dytë, 45 minutësh ku dominuan ndeshjen ndryshe nga pjesa e parë ku ishim shumë pak të rrezikshëm. Ajo që u evidentua sërish edhe në Gjeorgji ishte mungesa e konkretizimit duke qenë se humbën raste të shkëlqyera për të mbyllur shpejt ndeshjen përmes Bajramit dhe Dakut. /vizionplus.tv
