E marta do të jetë dita ku nis shqyrtimi dhe miratimi nen për nen i paketës së ndryshimeve kushtetuese në Komisionin e posaçëm parlamentar për reformën në drejtësi. Kryetari i Komisionit Fatmir Xhafaj, bëri me dije se drafti i është shpërndarë grupeve parlamentare. Ai u tha gazetarëve se në këtë dokument është përfshirë kërkesa e hershme e opozitës sipas tij, për votim me 2/3 e votave të anëtarëve të institucioneve të drejtësisë.
“Është e pranueshme dhe për sa kohë u rekomandua si një zgjidhje konsensuale ne e kemi pranuar dhe në respekt të nevojës dhe dakordësisë së arritur. Sot në projekt është me 2/3.”
Ndërsa ndaj pretendimit të opozitës për zbatim të formulës së “vendeve të rezervuara”, Xhafaj theksoi se asnjëherë kjo çështje nuk ka qenë dakordësuar mes palëve.
“Vendet e rezervuara nuk ka qenë kurrë e dakordësuar mes palëve dhe nuk është definuar nga Venecia si zgjidhje. Institucionet të ndahen mes partive. Që do të thotë PS të ketë të vetët në Këshillin e Lartë të Gjyqësorit dhe Këshillin e Lartë të Prokurorisë, PD të vetët, dhe LSI të vetët.”
Ndërsa për Petrit Vasilin e LSI-së, i cili bashkë me Fatmir Xhafën ishin pjesë e takimit mes kryeministrit Rama dhe kreut të Kuvendit Meta, ekziston mundësia për gjetjen e një kompromisi politik.
“Kemi shprehur besimin se janë të gjitha mundësitë që në përputhje me opinionin final të Venecias dhe rekomandimet e OBDAT dhe EURALIUS ekzistojnë të gjitha mundësitë për gjetjen e një zgjidhje për këtë pretendim të vetëm që ka PD dhe që pengon miratimin e reformës në drejtësi për të gjithë zgjidhje gjithëpërfshirëse dhe sa më emergjente se koha nuk pret. Duke shpresuar dhe sugjeruar që dhe opozita duhet të tregojë fleksibilitetin më të madh të mundshëm janë të gjitha mundësitë për të pasur një zgjidhje gjithëpërfshirëse që i siguron reformës në drejtësi legjitimitet, integritet dhe standarte të plota të përputhura me kriteret e Venecias dhe që e bëjnë solide dhe të gjithëpranuar.”
Por nëse Kuvendi nuk do të arrijë votimin e reformës, Xhafaj parashikon votën nga populli. Edhe pse nuk specifikoi nëse do të jetë referendum për reformën apo ndoshta vendi mund të shkojë në vjeshtë drejt zgjedhjeve të parakohshme.
