Mijëra afganë janë dyndur në aeroportin e Kabulit në dy javët e fundit në një përpjekje të dëshpëruar për të lënë vendin dhe për t’i shpëtuar kontrollit të talebanëve.
Gjigandi mediatik “BBC” foli me një burrë që nuk mundi të shpëtonte. Ai tani është fshehur, së bashku me gruan dhe foshnjën. Ai mendon se është objektivi kryesor i talebanëve, për shkak të rolit të tij të fundit në qeveri.
“Unë isha në një departament që menaxhonte të dhënat e shërbimit të njerëzve. Talebanët e dinë që nëse më kapin, ata mund të marrin emrat dhe adresat e shumë njerëzve që duan të synojnë.”
Ai ka dëgjuar nga fqinjët e tij se talebanët shkuan në shtëpinë e tij të paktën tre herë në dy javët e fundit.
“Nuk do të jetë i lehtë largimi pasi talebanët kanë thënë se kanë mbyllur të gjitha pikat kufitare me vendet fqinje. Megjithatë, unë jam gati të marr përsipër rrezikun. Ata kurrë nuk do të më falin. Nëse qëndroj në Kabul, talebanët do të më vrasin, nëse më gjejnë.”
