Vizita e rrallë e zyrtarëve të lartë të Koresë së Jugut në Phenian, ka dhënë rezultate pozitive në zbutjen e tensioneve. Krerët e Koresë së Veriut dhe të Jugut do të takohen në një samit të përbashkët mes dy vendeve muajin e ardhshëm, shkruajnë mediat e Seulit.
Një ditë pas takimit, lideri i Koresë së veriut Kim Jong Un është shprehur hapur se dëshiron të “përparojë fuqishëm” ne marrëdhëniet me Korenë e Jugut, duke nisur kështu një faqe të re në historinë e dy vendeve. Madje sipas mediave lideri i vendit komunist është shprehur i gatshëm të bisedojë me SHBA-të mbi programin bërthamor.
Takimi në prill, do të jetë i pari mes udhëheqësve të dy vendeve në më shumë se një dekadë. Kjo është një kthesë e madhe për Korenë e Veriut
Përmirësimi i klimës në gadishull vjen pas përpjekjeve te Seulit për të gjetur një zgjidhje diplomatike mbi programin e armëve bërthamore.
Agjencia shtetërore ka publikuar foto të takimit të së hënës, dhe njofton se Kim ka mirëpritur ngrohtësisht delegacionin.
Ndërsa Seuli e ka komentuar shkurtimisht në takim, duke thënë se të dy palët kanë arritur një “marrëveshje të kënaqshme” për mbajtjen e bisedimeve të ardhshme.
