Pas deklaratës së presidentit të Këshillit Europian, Charles Michel, në forumin e Bledit që shtetet kandidate të bëhen gati për anëtarësimin në BE deri në vitin 2030, ka reaguar edhe përfaqësuesi i lartë i BE-së Joseph Borell.
Gjatë një konference në Madrid, Borell njoftoi se unioni do të mbajë një konferencë të përbashkët me Ballkanin perëndimor në fund të këtij muaji për të analizuar situatën në rajon.
Ai nënvizoi se BE duhet të jetë e gatshme për pranimin e vendeve anëtare, por vetëm kur kandidatët të përmbushin kushtet.
“Çështja e zgjerimit ka qëndruar lart në diskutimet tona. Ukraina duhet të bëhet një vend anëtar i Bashkimit Europian. Ballkani Perëndimor gjithashtu. Sa më shpejt. Lufta në Ukrainë ka pasur një efekt kolateral për të përshpejtuar procesin e zgjerimit. Sigurisht që është një proces i bazuar në meritë. Një shtet do të bëhet anëtar kur të përmbushë të gjitha kushtet. Por në të njëjtën kohë është mirë për të caktuar një objektiv politik”.
Shefi për politikën e jashtme foli edhe për dialogun, duke konfirmuar takimin e radhës Kurti-Vuçiç, i cili do të mbahet me 14 shtator.