Përfundoi me sukses operacioni për shpëtimin e 12 futbollistëve të vegjël tajlandezë dhe trajnerit te tyre nga shpella e përmbytur në Tajlandë.
Ata janë dërguar në spital për një trajtim më të specializuar pas rreth 2 javësh të mbetur të bllokuar në shpellë mes errësirës dhe mungesës së ushqimit. Fëmijët e moshave nga 11 deri në 16 vjeç, tetë prej të cilëve u shpëtuan gjatë dy ditëve të para të operacionit, tashmë ndodhen në spital. Ata janë në gjendje të mirë mendore dhe fizike, ndërsa po i bëhen të gjitha ekzaminimet e nevojshme për shkak se disa kishin temperaturë të ulët dhe të tjerë probleme me mushkëritë.
Ndërkohë sot është një ditë e shënuar për Tajlandën pasi u realizua me sukses faza e tretë dhe e fundit me evakuimin e të gjithë djemve të bllokuar. I fundit që doli nga shpella ishte trajneri 25 vjeçar.
Më shumë se 20 zhytës u përfshinë në ndërhyrjen vendimtare, ndërsa më shumë se 80 zhytës u angazhuan prej ditësh gjatë gjithë operacionit. Një zhytës vullnetar 38 vjeç, i cili mori përsipër dërgimin e bombolave të oksigjenit fëmijëve humbi jetën pasi mbeti pa ajër në mes të rrugës së kthimit, e cila ishte rreth 1 kilometër e gjatë, e gjitha nën ujë. Aty u kuptua se operacioni i shpëtimit ishte më i ndërlikuar dhe kompleks nga sa mendohej.
Por fatmirësisht, tashmë të gjithë fëmijët dhe trajneri janë shëndoshë e mirë. Historia e tyre ka marrë vëmendjen e të gjithë botës. Presidenti amerikan Donald Trump tha se lajmi i shpëtimit është kaq i bukur, pasi të gjithë tashmë janë të shëndoshë e mire. Me anë të një postimi në Twitter ai përgëzoi të gjithë zhytësit e përfshirë në shpëtimin e djemve dhe trajnerit të tyre.
Djemtë u zhdukën ditën e 23 qershorit teksa ishin duke eksploruar shpellën por ata mbetën të bllokuar për shkak të shirave të mëdha të stinës.
