Demokratja Jorida Tabaku ngriti si shqetësim këtë të martë korrupsionin, për të cilin sipas saj, Shqipëria mban vendin e dytë në botë.
Duke iu referuar raporteve nga Banka Botërore e BERZH, Tabaku deklaroi në rrjetet sociale se zyrtarët shqiptarë pasurohen nga taksat që paguajnë qytetarët.
Ajo nuk la pa sulmuar mazhorancën, duke u shprehur se ajo është veçanërisht e lidhur me korrupsionin.
“Një shtet i kapur nga korrupsioni, që fut duart në xhepat e sipërmarrjeve dhe qytetarëve. Kjo është e vërteta e Shqipërisë që pasqyrohet edhe nga Banka Botërore dhe BERZH. Të dytët në botë për korrupsionin, me zyrtarë që mbushin portofolet nga taksat e shqiptarëve dhe u heqin fitimet bizneseve të shqiptarëve. Tri herë më shumë korrupsion paguajnë bizneset shqiptare në raport me 8 vite më parë! Ky nuk është as raporti i vetëm dhe as raporti i fundit ndërkombëtar që tregon natyrën e vërtetë të regjimit të korruptuar që shqiptarët kanë përballë. Korrupsioni është oksigjeni i kësaj mazhorance prandaj ajo stimulon pandershmërinë dhe paligjshmërinë. Një regjim që vjedh zgjedhjet mund të ofrojë vetëm vjedhjen dhe korrupsionin si formë qeverisje!”
