Qeveria kërkon t’i rikthejë optimizmin ekonomisë në vitin 2021, pas krizës së pandemisë dhe tërmetit, duke planifikuar një super buxhet, i cili ngre pikëpyetje lidhur me realizimin e tij, aq më tepër që përkon me një vit zgjedhor.
Mazhoranca e cilëson si draftin e rimëkëmbjes, pasi rindërtimi si dhe investimet publike zënë një peshë të konsiderushme me 120 mld lekë, ose sa 7.2% e PBB.
Kryetarja e Komisionit të Ekonomisë, Milva Ekonomi e ftuar në emisionin E-Zonë, thotë se buxheti është mbështetur në analiza realiste.
“Siguria jonë që niveli i të ardhurave do të realizohet bazohet në kontrollin më të mirë të situatës në terren si pasojë e zbatimit të fiskalizimit, çka do të thotë se do të ndikojë në reduktimin e evazionit, për pasojë do të mblidhen më shumë të ardhura. Nga ana tjetër, plani i qeverisë për një paketë për punësimin, duke ndarë kostot mes biznesit dhe qeverisë për rritjen e punësimit do të ndikojë në rritjen e konsumit. Paralelisht, rindërtimi do t’i japë më shumë frymëmarrje ekonomisë në vitin që vjen”, tha Ekonomi.
Por, eksperti i Partisë Demokratike, Mateo Spaho e konsideron buxhetin si një ëndërr të bukur të qeverisë, i cili nuk do të mund të realizohet.
“Ajo çka dimë me siguri është se të ardhurat nuk janë të sigurta, ndërsa shpezimet po. Për shkak të pandmesië, angazhimet e shteteve për të dhënë hua për rindërtimin duken të zbehta, çka do të thotë se bumi i rindërtimit vihet në pikëpyetje. Unë e shoh me rrezik që pas zgjedhjeve, buxheti jo vetëm do të rishikohet, por ekziston frika se do të rriten taksat për të garantuar ofrimin e shërbimeve”, tha Spaho.
Në vitin që vjen, kemi një dyfishim të pagesave për kontrata me PPP, duke kapur shifrën e 15 miliard lekëve, ndërsa parashikohet edhe aktivizimi i gjashtë kontratave të reja koncesionare, ku më kryesorja është ndërtimi i rrugës Milot-Fier, apo ndërtimi i tunelit të Llogarasë.
