Një grua humbi jetën dhe tre të tjerë mbetën të plagosur pasi një person i armatosur hapi zjarr në një sinagogë në Kaliforni.
Ngjarja e rëndë ndodhi pasditen e së shtunës, teksa besimtarët ishin duke kremtuar festën e pashkës. Dëshmitarët thanë për mediat se dëgjuan disa të shtëna me armë dhe më pas autori u largua nga vendi I ngjarjes.
Por autoritetet kanë arrestuar një 19 vjeçar, John Earnes, jo shumë larg sinagogës, si të dyshuarin kryesor për sulmin. Ai u kap në veri të qytetit të San Diegos.
Hetuesit kanë dyshime të forta se 19 vjeçari, mund të ketë lidhje edhe me një zjarr që përfshiu një xhami në zonë muajin e kaluar. Autoritetet gjithashtu janë vënë në gadishmëri për të mbajtur vendet e adhurimit të sigurta.
Presidenti amerikan Donald Trump ngushëlloi familjarët e personave të prekur, ndërsa për sulmin në sinagogë tha se dukej “si një krim urrejtjeje”.
Sulmi në sinagogë vjen 6 muaj pas të shtënave në një sinagogë në Pittsburg ku 11 persona humbën jetën si pasojë e agresionit nga një supremacist I bardhë.
