Ambasada e SHBA-ve në Bagdad është vënë në shënjestër nga një valë sulmesh me dronë dhe raketa.
Institucioni kishte lëshuar një alarm të ri sigurie për qytetarët amerikanë në Irak, ku paralajmëronte se “milicitë terroriste të lidhura me Iranin po sulmonin në mënyrë të përsëritur zonën ndërkombëtare” në qendër të Bagdadit.
Nga sulmet në ambasadë nuk raportohet të ketë patur viktima.
Ndërkohë konflikti mes Iranit, ShBA-së dhe Izraelit po përshkallëzohet, me goditje të reja ajrore. Avionët izraelitë kanë shënjestruar disa zona në jug të Libanit, përfshirë periferitë e Bejrutit, ndërsa ushtria izraelite konfirmoi sulme të reja edhe në kryeqytetin Iranian, Teheran.
Ministri i Mbrojtjes, Israel Katz, tha se zyrtari i lartë iranian, Ali Larijani, u vra në një goditje ajrore, ndërsa ushtria bëri me dije se një sulm i veçantë eliminoi edhe komandantin e forcës paramilitare Basij.
Ndërkohë, bombardimet me raketa dhe dronë vijojnë në rajonin e Gjirit, ku Katari, Arabia Saudite, Emiratet e Bashkuara Arabe dhe Kuvajti raportojnë se kanë neutralizuar disa goditje ajrore. Në Abu Dhabi, një person humbi jetën nga mbetjet e një rakete, ndërsa në Bagdad raportohen të paktën katër viktima pas shpërthimeve në një godine banimi.
Autoritetet saudite njoftuan se kanë rrëzuar mbi 12 dronë në lindje të vendit, ndërsa incidente të ngjashme janë raportuar edhe në Katar dhe Kuvajt.
Nga ana tjetër, Irani ka ashpërsuar retorikën ndaj SHBA-ve, duke deklaruar se përfundimi i luftës do të vendoset në fushëbetejë dhe jo përmes deklaratave politike.
Konflikti, që nisi më 28 shkurt, po zgjerohet me shpejtësi në disa fronte dhe po rrit frikën për një përplasje më të gjerë rajonale dhe pasoja të rënda për sigurinë globale.
