Kryeqyteti britanik Londër ndodhet nën terror. Policia vrau një person që tentoi të hynte në ndërtesën e parlamentit, pasi më parë kishte përplasur me një makinë fouristradë disa këmbësorë në Urën Westminster.
Sipas raportimeve, 3 persona humbën jetën dhe te paktën 20 të tjerë kanë mbetur të plagosur, disa prej tyre në gjendje të rendë. Agresori përplasi këmbësorët dhe hyri në perimetrin e Parlamentit, ku goditi me thikë një polic, përpara së te vritej nga forcat e rendit.
Një prej viktimave të kësaj ngjarjeje është grua, viktima e dytë është polici i plagosur, ndërsa për të tretën nuk ka informacione. Mes të plagosurve mësohet të jenë tre nxënës francezë. Disa prej të lënduarve kanë rënë në lumin Tamiz, prej nga është nxjerrë edhe një grua.
Ndërtesa e parlamentit u rrethua nga agjentet e antiterrorit, edhe pas dyshimeve për një bombë në një automjet pranë parlamentit. Kryeministrja Theresa May arriti të largohej me një automjet dhe pritet të thërrasë një mbledhje urgjente të qeverisë. Deputetët u detyruan të qëndronin për disa orë të bllokuar në ndërtesën e parlamentit, që qëndroi e mbyllur.
Policia e Londrës njoftoi se ngjarja po hetohet si incident terrorist derisa të mësohen detaje të tjera. Sipas disa mediave, dyshohet që autor i sulmit të jete Abu Izadeen, që më parë mbante emrin Trevor Brooks, një predikues radikal me origjinë xhamakiane dhe i njohur për shërbimet e inteligjencës që nga viti 2006 për lidhjet e tij me terrorizmin. Megjithatë, nuk ka një konfirmim zyrtar nga policia britanike.
Kjo ngjarje në zemër të jetës politike të Londrës, ndodh në përvjetorin e sulmeve terroriste të Brukselit, ku humbën jetën 32 persona.
