Tmerr në rrugët e Barcelonës. Dy persona kanë ndërruar jetë, ndërsa disa të tjerë janë plagosur pasi një furgon është futur me shpejtësi mes këmbësorëve në një zonë turistike.
Mediat raportojnë se furgoni u drejtua nga turma e kalimtarëve në momentin që ata po kalonin nga njëri trotuar në tjetrin. Dëshmitarët raportojnë se në vendin e sulmit terrorist janë dëgjuar të shtëna me armë zjarri dhe janë parë dy persona që mbanin në duar kallashnikovë.
Ambulanca dhe policia kanë mbërritur menjëherë në vendin e njohur “Las Ramblas”, duke evakuuar menjëherë sheshin.
Autoritetet kanë vënë në dispozicion edhe një helikopter. Linjat e metrosë dhe dyqanet përreth janë mbyllur, ndërsa pamjet tregojnë se këmbësorët vraponin nga të katër anët të tmerruar.
Policia është vënë në ndjekje të autorit të ngjarjes, i cili u arratis menjëherë pas përplasjes, ndërsa shpjegon se kemi të bëjmë me një sulm terrorist.