Turqia goditet sërish nga një sulm terrorist. Të paktën 28 persona kanë humbur jetën dhe 61 të tjerë kanë mbetur të lënduar, si pasojë e një shpërthimi të fuqishëm në zemër të kryeqytetit turk. Bëhet fjalë për një makinë bombe, e cila ka plasur sapo pranë saj ka kaluar një autobus që transportonte ushtarë. Sipas hetimeve paraprake mësohet se këta të fundit kanë qenë dhe objektiv i sulmit. Menjëherë në vendin e ngjarjes mbërritën zjarrfikës dhe ambulanca për t’u ardhur në ndihmë të mbijetuarve të këtij sulmi, i cili ndodhi shumë pranë godinës së parlamentit në Ankara. Zv/kryeministri Bozdag e cilësoi një akt të pastër terrorist, ndërsa kryeministri Dautoglu anuloi vizitën e tij për në Bruksel. Specialet ndërkohë ndodhen në gjendje gatishmërie nga frika e sulmeve të reja terroriste. Deri më tani askush nuk e ka marrë përsipër këtë sulm terrorist, por nga hetimet paraprake dyshohet se ai është kryer nga militantë të ISIS ose rebelët kurd, organizata këto të cilave Turqia u ka shpallur luftë. Ministri i jashtëm Ditmir Bushati përmes një komenti në rrjetin social twitter ka shprehur ngushëllimet për familjarët e viktimave, ndërsa ka dënuar aktin terroriste. Ndërkohe Ministria e Mbrojtjes ne Shqipëri konfirmoi se nga ky shpërthim nuk ka patur të lënduar në radhët e shqiptarëve.
Sulm terrorist në Ankara
