Për herë të parë që nga nisja e luftës, Rusia lëshoi një raketë balistike ndërkontinentale drejt Ukrainës.
Forcat ajrore ukrainase bënë me dije se nisja u krye nga një zonë në juglindje të Vologogradit, që kufizohet me Detin Kaspik.
Sulmi kishte në shënjestër rajonin e Dnipros, ndërsa nuk ka raportime për viktima apo të plagosur.
Ndërsa situata sa vjen e rëndohet, Evropa po përgatitet për mundësinë e një Lufte të Tretë Botërore.
Mediat ndërkombëtare kanë publikuar disa dokumente sekrete gjermane, që tregojnë se Berlini ka filluar të bëjë plane për mënyrën se si mund të ndihmojë në dislokimin e deri në 800 mijë trupave të NATO-s –duke përfshirë amerikanë në Ukrainë, nëse Rusia do intensifikoi sulmet bërthamore.
Po ashtu Gjermania po shikon mundësinë e vendosjes së 200 mijë automjete ushtarake në të gjithë territorin e saj.
I alarmuar nuk është vetëm Berlini. Suedia dhe Norvegjia gjithashtu kanë lëshuar së fundmi broshura që udhëzojnë qytetarët se si të veprojnë nëse konflikti i Luftës së Ukrainës përhapet në vendet e tyre.
Ndërsa Hungaria do ta vendosë një sistem për mbrojtje ajrore në pjesën verilindore të vendit.
“Ne ende besojmë se do të ketë paqe sa më shpejt të jetë e mundur, përmes diplomacisë. Megjithatë, për t’u përgatitur për të gjitha mundësitë, porosita që sistemet e kontrollit ajror dhe të mbrojtjes ajrore të blera së fundmi dhe aftësitë e ndërtuara mbi to të instalohen në veri-lindje. Kërcënimi i përshkallëzimit të luftës Ukrainë-Rusi është më i madh se kurrë”, tha ministri i Mbrojtjes në Hungari, Kristóf Szalay-Bobrovniczky.
Shqetësimet janë rritur pasi presidenti rus Vladimir Putin ndryshoi zyrtarisht politikën e sulmeve bërthamore të Kremlinit të marten, ndërsa Ukraina ka nisur të përdor raketat me rreze të gjatë veprimi të prodhimir amerikan dhe britanik./vizionplus.tv
