Ermonela Jaho është kthyer në emrin më të lakuar nga kritikët britanikë në faqet e kulturës. Mediat prestigjioze si BBC, “Financial Times” dhe “The Independent” e rendisin si artisten me pesë yje që meriton duartrokitjet e kujtdo që po e ndjek në Royal Opera House.
“Ajo është më delikatja e mundshme për rolin në Butterfly. Sopranot tjera mund të këndojnë më fuqishëm, por ajo jep emocionin, dhe të drithëron. Kombinimi i zërit të saj me muzikë është një kombinim perfekt”, shkruan kritika e “Financial Times” për Ermonela Jahon dhe rolin e saj në Royal Opera në Londër.
“Times” shkruan se Ermonela di ta çojë publikun deri në lot me performancën e saj, dhe këtë e ka treguar qysh me rolin e saj në Suor Angelica.
Jaho po performon në Londër në rolin e saj në Operën e famshme të Puçinit – “Madama Butterfly”, ndërsa rolin e saj në shfaqjet e tjera pritet ta marrë sopranoja, Maria Martinez.