Suedia mund të përballojë një valë të dytë të COVID-19 më mirë se vendet e tjera

Shumë njerëz në Suedi kanë qenë të ekspozuar ndaj koronavirusit. Kjo mund të bëjë që vendi të jetë në një pozicion më të favorshëm se shtetet e tjera në përballimin e një vale të dytë, ashtu siç po përflitet tani.

Epidemiologu suedez Ander Tegnell tha se vendimi i qeverisë për të mos izoluar vendin ka funksionuar në disa aspekte.

“Ka funksionuar sepse sistemi ynë shëndetësor ka qenë në gjendje të përballojë pacientët. Gjithmonë ka pasur të paktën 20% të shtretërve të kujdesit intensiv bosh dhe mjekët e infermierët kanë qenë në gjendje të kujdesen për pacientët me COVID-19.”

Tegnell vlerësoi se një nivel imuniteti nga 15% deri në 20% është arritur në popullatën e Stokholmit, për të cilën ai tha se do të ngadalësojë përhapjen në një valë të dytë.

Por ai paralajmëroi se kjo nuk do të ishte e mjaftueshme për të arritur imunitetin e popullatës dhe se ende nuk dihet shumë për imunitetin ndaj sëmundjes.

Suedia ka raportuar 16.755 raste të koronavirusit, përfshirë 2,021 vdekje, sipas të dhënave nga Universiteti Johns Hopkins.

I pyetur nëse numri i të vdekurve do të ishte më i ulët nëse Suedia do të kishte zbatuar kufizime më të rrepta, Tegnell u përgjigj kështu:

“Kjo është një pyetje shumë e vështirë për t’u përgjigjur në këtë fazë. Të paktën 50% e numrit tonë të vdekjeve është brenda shtëpive të të moshuarve dhe ne ende nuk e kuptojmë sesi një izolim do të ndalonte futjen e sëmundjes në shtëpitë e të moshuarve.”