Kërkimet kanë treguar se shkuarja te manikyristja sjell relaksim dhe eufori dhe redukton ankthin. Studimet e mëparshme kanë sugjeruar që këto efekte vijnë nga kimikatet e trurit që çlirohen kur biem në kontakt me prekjen e njeriut.
Por zbulimet e reja duket se tregojnë se përfitimet shëndetësore janë për shkak të diçkaje krejtësisht të ndryshme. Në fakt është rezultat i “vetëzbulimit sipërfaqësor”, i njohur ndryshe si biseda e çlirët që ke në sallonin e thonjve, sipas një studimi të ri.
Studiuesit nga dy universitete në Japoni anketuan 500 gra për të zbuluar efektet psikologjike të rregullimit të thonjve. Rreth 300 gra shkonin rregullisht në një sallon, dhe pjesa tjetër i rregullonin thonjtë në shtëpi, ose fare.
Më pas, pjesëmarrëset vlerësuan shkallën në të cilën përjetuan emocione të ndryshme gjatë një seance për bërjen e thonjve në një shkallë katërpikëshe nga “fare” në “jashtë mase”. Gratë që shkonin për manikyr u pyetën edhe për përmbajtjen dhe cilësinë e bisedave të tyre me manikyristët dhe klientët e tjerë. Rezultatet treguan se ato që rregulluan thonjtë në një sallon përjetuan emocione dukshëm më pozitive si relaksimi, krahasuar me ato që e bënin vetë në shtëpi. Tema e bisedës me të tjerët gjatë bërjes së thonjve ndikoi në humorin e pjesëmarrësve.
Vetëzbulimi sipërfaqësor, të cilin studiuesit e përkufizuan si diskutime për pasionet dhe jetën e përditshme, u shoqërua me rritje të emocioneve pozitive, por vetëzbulimi më i thellë, që kishte të bënte me tiparet negative të personalitetit dhe vështirësitë e jetës, kishte një ndikim negativ në disa rezultate psikologjike.
Autori i studimit Atsushi Kawakubo, një profesor i asociuar në Universitetin Saitama Gakuen, tha për PsyPost: “Hulumtimi ynë tregon se trajtimi i thonjve në sallon, i shoqëruar me një vetëzbulim të lehtë, mund të japë një nxitje pozitive për gjendjen psikologjike të dikujt. “Kjo praktikë ofron një mënyrë të prekshme për individët për të promovuar mirëqenien e tyre mendore, duke i vënë theksin rëndësisë së kujdesit për veten dhe përfitimet e mundshme të ndarjes së mendimeve personale në një mjedis komod.”
Studiuesit thonë se duhen më shumë kërkime për të nxjerrë përfundime të qëndrueshme. Në këtë rast, nuk kishte asnjë grup kontrolli dhe të dhënat u raportuan vetë./Living/
