Kryeministri Edi Rama e cilësoi si unikale stërvitjen ushtarake të NATO-s “Defender 21”, që nisi këtë të martë nga Porti i Durrësit.
Shefi i qeverisë, pjesëmarrës në ceremoni, deklaroi se kjo stërvitje forcon më shumë marrëdhëniet Shqipëri-SHBA.
“Besoj që kjo stërvitje është edhe një tjetër pikë e rëndësishme në ngjitjen e mëtejshme të marrëdhënieve tona në pikën më të lartë. Ne vazhdimisht i vlerësojmë këto marrëdhënie si të shkëlqyera, por fakti është që ato mund të jenë gjithmonë e më të shkëlqyera falë një besimi të madh dhe një ndërveprimi reciprok të vazhdueshëm. Do të vazhdojmë të qëndrojmë besnikërisht krah për krah jush. Ndoshta nga pikëpamja numerike nuk i ofrojmë shumë kësaj Aleance, por nga pikëpamja e vlerave, dëshirojmë të jemi gjithmonë e më të denjë dhe të vyer brenda kësaj Aleance. Shumë faleminderit, moment historik për ne, na mbush me krenari e përgjegjësi, do vazhdojmë të qëndrojmë besnikërisht krah jush, si një vend që nga pikëpamja numerike nuk ju ofrojmë shumë, por nga pikëpamja e vlerave që e bëjnë këtë aleancë unikale për botën tonë. Dëshirojmë të jemi gjithmonë e më të denjë, brenda kësaj aleance. Shumë faleminderit. Suksese në këtë stërvitje unikale në historinë e marrëdhënieve tona, për t’i dhënë një mesazh shumë të qartë rajonit, dhe përtej saj kushdo që ka nevojë për përgjigje pë qëndrimin tonë në këta aleancë në krah të SHBA, dhe vendet e tjera që për lirinë e demokracinë paguajnë çdo çmim.”
Edi Rama kujtoi sesi në periudhën e komunizmit, amerikanët etiketoheshin si armiq. Gjeneralëve amerikanë që kishin ardhur për ceremoinë kryeministri u tha se do të rikthehen në Shqipëri sepse vendi ynë e ka këtë veçori: I bën njerëzit të kthehen sërish.
“Gjenerata jonë lindi dhe u rrit me idenë se ju nuk duheshit lënë kurrë të shkelnit në këtë vend. Ne të gjithë u brumosëm nga propaganda e regjimit të shkuar me bindjen se ju jeni e keqja më e madhe që mund t’i ndodhë jo vetëm Shqipërisë, por mbarë botës. Për gjeneratën tonë është një mrekulli e madhe që e ka ndarë jetën mes dy botëve. Dua shumë të besoj që pas zbarkimit tuaj në Shqipëri, edhe juve do t’ju ndodhë ajo që u ndodh të gjithëve kur vijnë në Shqipëri. Do të doni të vini përsëri. Shqipëria nuk është një vend i këshilluar për të ardhur, për shkak të stereotipeve, por kush vjen, dëshiron të rikthehet. Kam besim se kjo do të ndodhë edhe me ju. Besoj që ajo çka ne të gjithë së bashku duhet të mbajmë parasysh është detyrimi për t’u përcjellë gjeneratave të tjera këtë amanet kaq të rëndësishëm për të ardhmen e vendit tonë, por edhe të botës së madhe. Amanetin e kësaj marrëdhënieje strategjike për lirinë dhe demokracinë, duke u investuar së bashku që të bëjmë edhe më shumë për brezin e ri, në të gjitha aspektet.”
