Kryeministri britanik Keir Starmer ka dhënë një mesazh të ashpër ndaj emigrantëve që mbërrijnë në Mbretërinë e Bashkuar ilegalisht me gomone.
Në një postim në “X” ai deklaroi se hyrjet e paligjshme nuk do të shpërblehen dhe se çdo person që kalon Kanalin në këtë mënyrë do të ndalohet dhe do të kthehet mbrapsht.
“Jam i qartë: ne nuk do të shpërblejmë hyrjen e paligjshme. Nëse kaloni Kanalin në mënyrë të paligjshme, do të ndaloheni dhe do të ktheheni mbrapsht”, shkroi ai në “X”.
Deklarata e tij vjen në një kohë kur numri i emigrantëve që kalojnë Kanalin Anglez ka arritur nivele rekord, ndërsa presioni ndaj qeverisë për të reduktuar përdorimin e hoteleve për strehimin e azilkërkuesve po rritet.
Protesta të vogla jashtë hoteleve janë shfaqur në disa zona të vendit, raporton Sky News. Starmer tha se qeveria e tij është e vendosur të trajtojë këtë çështje me seriozitet dhe të ndalojë përdorimin e rrugëve ilegale për të hyrë në Britani.
