Një konflikt brenda familjes në Roskovec përfundoi në tragjedi duke lënë pas dy viktima.
Xhevahir Hoxha 61-vjeç vrau me thikë në banesë bashkëjetuesen e djalit të tij, 30-vjeçaren Merushe Hazizi, e më pas u vetëvar në një pemë pas banesës, duke i dhënë fund jetës.
Ngjarja e rëndë ndodhi në fshatin Vidhishtë rreth orës 12:30. Shkak për vrasjen u bënë debatet brenda familjes. Kjo pasi i moshuari ishte kundër lidhjes së djalit të tij me të renë, e cila ishte e divorcuar dhe kishte tre fëmijë nga martesa e parë.
Krimi, sipas banorëve, ishte i paralajmëruar pasi Xhevahir Hoxha u thoshte shpesh të gjithëve që do ta vriste bashkë me djalin.
30-vjeçarja Merushe Hazizi kishte tre vite që bashkëjetonte me djalin Xhevahir Hoxhës. Ndërkohë fëmijët e saj jetonin me ish-bashkëshortin.
