Spasovski: Maqedonia e Veriut, e gatshme të përballet me çdo formë të terrorizmit

Maqedonia e Veriut po ndërmerr veprime serioze për të luftuar terrorizmin ose për të parandaluar çdo aktivitet që mund të rrezikojë gjendjen e sigurisë, deklaroi të premten ministri i Punëve të Brendshme i Maqedonisë së Veriut, Oliver Spasovski.

Spasovski u pyet nëse ka indikacione se gjendja e sigurisë në vend mund të prishet, qoftë lidhur me mosmarrjen e datës së nisjes së bisedimeve me Bashkimin Evropian, alarmeve për “bomba të rreme”, apo aspekte tjera që ndërlidhen me rajonin në përgjithësi.

Pas lëshimit në përdorim të një objekti policor në Shkup, donacion nga Shtetet e Bashkuara të Amerikës, Spasovski tha se “aktualisht nuk ka të dhëna për prishje të situatës së sigurisë në Maqedoninë e Veriut”.

“Kjo është një sfidë serioze, për këtë arsye të gjitha autoritetet kompetente, Ministria e Brendshme, Agjencia e Sigurisë Kombëtare e Agjencia e Inteligjencës, po marrin masa serioze për luftimin e terrorizmit ose parandalimin e çdo aktiviteti që mund të rrezikojë situatën e sigurisë. Për momentin nuk ka të dhëna për ndonjë shkelje të situatës së sigurisë në vend. Të gjitha njësitë brenda Ministrisë së Brendshme dhe të gjitha agjencitë veprojnë në nivelin më të lartë. Në fakt, kohëve të fundit raportet e rrejshme për akte terroriste treguan nivelin e gatishmërisë së Policisë dhe agjencive maqedonase për t’u përballur me sfidë të tillë”, deklaroi Spasovski.

Sa i përket risocializimit dhe riintegrimit të personave që janë kthyer nga luftërat jashtë Maqedonisë së Veriut, si në Siri, Irak dhe Afganistan, Spasovski tha se “është proces shumë i rëndësishëm, po aq i rëndësishëm sa edhe ndjekja penale e atyre që kanë kryer krime të tilla”.

Edhe ambasadorja amerikane në Shkup, Kate Byrnes, tha se risocializimi është një proces i ndërlikuar dhe i vështirë, por, sipas saj, është e rëndësishme që institucionet të fokusohen te riintegrimi.

Ajo ka theksuar se ndërmjet dy qeverive po mbahet komunikim i rregullt për këtë çështje.

“Kemi konsultime të rregullta lidhur me këtë. Shtetet e Bashkuara janë të përkushtuara, jo vetëm si partner i NATO-s, por edhe në mënyrë dypalëshe për të vazhduar punën për ngritjen e kapaciteteve. Një pjesë e kësaj përpjekjeje po bëhet nëpërmjet Programit Ndërkombëtar për Mbështetje të Hetimit Kriminal, për të siguruar që oficerët e policisë të marrin trajnimin më të mirë të mundshëm, si dhe hetuesit për ta bërë më të qartë se si t’i përdorin provat e fushëbetejës në hetimet penale kundër terroristëve të kthyer në vendet e tyre. Gjithashtu edhe për t’u siguruar që programet sociale që po aplikohen në mbështetje për familjet e prekura, do të marrin ndihmën e nevojshme për risocializimin”, tha Byrnes.

Aktualisht, në Maqedoninë e Veriut 13 persona janë duke vuajtur dënimin me burgim, për shkak të përfshirjes në luftërat e huaja.

Më 18 korrik 2021, 23 shtetas të Maqedonisë së Veriut janë kthyer nga zonat e luftimeve në Siri dhe Irak. Në zonat e luftimeve në Siri dhe Irak edhe më parë janë riatdhesuar shtetas të Maqedonisë së Veriut.

Në mars të vitit 2019 Gjykata Penale e Shkupit i ka dënuar me 45 vjet burgim shtatë shtetasit e Maqedonisë së Veriut, të cilët kanë marrë pjesë në formacionet paraushtarake të IS-it.