Qeveria spanjolle do të mirëpresë pjesëmarrjen e udhëheqësit katalanas Carles Puigdemont në zgjedhjet e reja.
Por, ish presidenti katalanas këmbëngul të mos heqë dorë nga posti i tij dhe as nga pavarësia. Ai bëri thirrje për të kundërshtuar sundimin e drejtpërdrejtë të Madridit, duke theksuar se Spanja veproi kundër vullnetit të popullit katalanas.
Ekzekutivi spanjoll mori kontrollin e plotë mbi Katalonjë mëngjesin e së shtunës. Mocioni për shpalljen e pavarësisë në parlamentin rajonal prej 135 vendesh, mori 70 vota pro dhe 10 kundër.
Pas shkarkimit të Pidgemont, në vendin e tij është zëvendëskryeministrja spanjolle, Soraja Saenz de Santamaria.
Një ditë pas heqjes së autonomisë në Katalonjë dhe shkarkimit nga detyra të presidentit të rajonit, në bazë të nenit 155 të Kushtetutës Spanjolle, Qeveria qendrore në Madrid urdhëroi mbajtjen e zgjedhjeve të reja për parlamentin rajonal në 21 dhjetor.
Ndërkohë mbështetësit e referendumit kanë lajmëruar një grevë 10 ditore që do të fillojë më 31 tetor, pas zbatimit të masave të reja. Ndërsa kundërshtarët kanë nisur një tubim të madh në Barcelonë për unitet. Mediat shkruajnë se shumë prej protestuesve bëjnë thirrje për të burgosur udhëheqësin katalanas.
Kriza në Madrid filloi me votimin e qytetarëve katalanas për ndarjen nga Spanja, proces të cilin Gjykata Kushtetuese e shpalli të pavlefshëm.
